Bye Bye 2008

好耐無打blog啦! 因為前排實在太忙啦, 過左一個忙碌的十二月! 公司、屋企都發生左好多事, 等我盡量記起再紀錄底2008年12份的事吧! 完成2008年最後一篇blog...

公司

忙 ~ 一個字忙! 因為係呀妹同事左個幾星期病假, 加上call台同茵姐同事又放吓大假, 一個人做幾個人的事. 真係過得好充實, 不過真係幾攞命! 好彩好好快就過左去.

炒 ~ 另外公司又炒人, 又再一次係炒老pat pat! 又係同Head Head 好friend做十幾年的同事, 大家知道左之後都好突然! 真係估唔到! 海嘯的威力真係勁! 希望佢可以快啲搵到份好工啦, 年尾流流比人炒真係好慘咖!

屈 ~ 又唔老闆佢地又有咩鬼主意, 繼上年新年前扣大家大假幾日, 今年又再一次係咁. 不過今次係接住初四之後放都好啲!

馮老先生 ~ 係23號放左工後, 全公司分左兩批人出發去左大酒店同馮老先生致最後敬意.

屋企

老媽 ~ 媽媽身體真係越嚟越差, 十二月中時佢又因為又痀又嘔入左醫院. 因為腸胃入左菌加上又轉左藥, 只想佢意志堅強啲. 身體健康就好了! 多謝各位的問候, 多謝PF的探訪. 感激!

維修 ~ @娘家 屋企好多野都日久失修, 之前有晚同公公講開娘家個廁所水箱壞壞地, 之後佢第二日係我不知情的情況下真係去左娘家整番好. 真係好surprise, thanks!

~ @夫家 屋企要搭棚, 仲要係我地間房出去整 -_- 大工程吧! 要將所有野包好, 又要搬開張大床褥, 又要鋪報紙... 係24號一日內整好左個棚, 不過唔知幾時先攪好呢?

聖誕節

總括嚟講成個假期都日日出街...

23 Dec night ~ 同茵姐同呀妹同事去完大酒店之後, 就三條友仔去左公公度食野. 大家有傾有講, 不知不覺見到換左衫收工的公公先知道已經十一點幾! 開心的時間過得特別快. 多謝你送給我們豐富美味的一餐!

24 Dec ~ 一早起身同公公收拾房間所有野! 因今日要搭棚, 公公趕返工, 自己攪好晒就買左碗粥返娘家. 晏晝同左豆豉我媽咪帶埋兩隻豬仔去左CWB join 埋公公去据扒! 之後諗住行下Times 不過當你見到人迫人時仲要帶住兩隻豬仔, 都係早啲返屋企吧!

25 Dec ~ 又出街, 帶左豬仔去左噴水池公園之後去左太古城行街街食埋飯, 之後送豬仔返屋企再約左PP伉儷同子龍兄去食宵夜.

26 Dec ~ 再出街, 又帶左豬仔去中環影聖誕樹. 之後去high tea再去玩遊戲...

27 Dec ~ 同左公公山頂遊, 之後比左一個 surprise dinner 比公公 ^0^!

28 Dec ~ 一早起身去左打羽毛球, 壁球, 兵乓波, 之後join埋一家大細食左個三合一早午餐. 再同公公左食吉野家...

29-30 Dec ~ 返工放工...

31 Dec ~ 2008年最後一日啦, 今日 Head Head 請飲茶又收早! 之後返左屋企執野, 因為師傅今日終於嚟拆野啦! 但係個棚... 出年先拆...

仲有幾個鐘就到2009年啦! 2008年對我最大改變的, 唔洗我講你都知係我終於嫁得出! 由 (Ms.) 變左 (Mrs.) ^0^ 好啦! 我要出去接公公同佢一齊倒數啦! 希望各位都開開心心迎接新的一年, 係呢度祝大家係新的一年身體健康, 人人有工開, 心想事成, All the Best!!

Happy New Year!! 新年快樂!!